Монгол Улс эдийн засгийн өндөр өсөлтөө хадгалж үлдэхийн зэрэгцээ өрсөлдөх чадвараа сайжруулахын тулд мэдлэгт суурилсан эдийн засагт шилжих шаардлагатай. Инновацийн тухай хууль энэ оны тавдугаар сарын 22-нд батлагдсан нь шинэ мэдлэг, шинэ технологит суурилсан үйлдвэрлэл, үйлчилгээг хөгжүүлэх эрх зүйн суурийг тавьсан ч энэ хүрээнд хийх, бүтээх ажил дөнгөж эхэлж буй. Шинжлэх ухаан, технологийн салбарын өнөөгийн нөхцөл байдалд дүн шинжилгээ хийх нь эхний алхам билээ.

Тиймээс Төвийн захирал Ч.Отгочулуу зургадугаар сарын 7-нд Үндэсний хөгжил, шинэтгэлийн хорооны хамт олонд “Монгол Улсын өрсөлдөх чадвар: Инноваци ба мэдлэг” сэдэвт илтгэл танилцуулав. Монгол Улсын Өрсөлдөх Чадварын Тайлан-2011-ээс үзэхэд манай орон шинжлэх ухаан, технологи болон боловсролын дэд бүтцийн хувьд сулхан үзүүлэлттэй байгааг хавсаргасан илтгэлээс үзнэ үү.  “Хоёр байгууллага хамтран ажиллаж, мэдээлэл солилцож байх нь чухал” хэмээн ҮХШХ-ны Шинэтгэлийн бодлогын газрын дарга Б.Ганбат онцлоод, ялангуяа инновацийг дэмжих чиглэлээр хамтарч ажиллах хэрэгтэйг тэмдэглэсэн юм.